Teks: Luk 7:36-49
As ek alles vergewe kan word, beteken dit ek kan leef soos ek wil?
Kort antwoord nee… en ja.
Nee – want ek is nie vry nie (was nooit nie en sal nooit wees nie).
Ja – want om jou aan Hom te verslaaf is om vry te wees! Om te leef soos Hy wil is om verslaaf te wees aan die Een wat vry is…
Ons kom later daarby. Hierdie vraag is baie prakties: Miskien het jy al die Evangelie vir iemand verduidelik of by iemand gehoor en daarna gevra: Beteken dit dat ek alles vergewe is? Kan ek nou leef soos ek wil en sal ek nooit daarvoor hel toe gaan nie! “Where’s the catch?”
No catch. Maar dit is die catch. Daar is geen catch nie. Onvoorwaardelike vergifnis… dit is nogal skrikwekkend. As ek alles vergewe is beteken dit seker ek moet alles gee… sou baie makliker gewees het as dit net ‘n transaksie was. Ek gee soveel soos ek dink ek nodig het. God betaal “vergifnis”, ek bly vry en in beheer van die transaksie. No complete sell-out…
Om die rede lees ons Lukus 7:36-49. Daar is twee karakter is die verhaal. Die een kan Jesus hanteer soos ‘n transaksie, die ander een moet Jesus hanteer soos ‘n minnaar. Die een kan berekend optree. Die ander kan nie help nie! Sy gee alles…
Ons gaan nou na Luk 7 kyk, maar luister net gou na die storie van Les Misrables. Valjean, ‘n geharde krimineel word alles vergewe – en besef hierdie is die grootste aanval op sy lewe ooit. Dit beteken hy moet vir die res van sy lewe teenoor die priester leef, sonder om instaat te wees om hom ooit terug te betaal. Altyd in die skuld. Soos wat hy aan dit begin oorgee, verander sy eie lewe en hy begin genade bewys… spesifiek aan sy vyand – Javert. Javert is ‘n polisieman, wat net met transaksies van reg en verkeerd werk. Wanneer Valjean uiteindelik Javert se lewe spaar, kan Javert nie langer lewe nie. Hy is eerder dood as wat hy verewig in die skuld is by Valjean… en gooi homself in die Sein rivier.
Jaag genade jou ook so skrik op die lyf? Sense jy ook dat as jy totale vergifnis ontvang en ervaar, jy nie meer aan jouself kan behoort nie? Is dit nie dalk wat jou Jesus op ‘n afstand laat hou nie… of ‘n lewe van goeie dade inspireër sodat jy nooit “genade” nodig het nie…?
Ek dink dit was die geval met die Fariseër Simon. Hy het Jesus nie nodig nie, want hy kan baie vinnig ‘n rekord van “godsdiens” optel. Hy kan nie liefde aan Jesus bewys nie, want hy besef nie wat Jesus vir hom gaan/kan doen nie. Hy kan nie anders as om koud en berekend met Jesus om te gaan nie… want hy is nie bereid om homself oor te gee nie…
Maar die prostituut… wat reeds baie vergewe is. Daar is niks berekend en gereserveerd aan wat sy doen nie. Soos ‘n vrou wat oorval is deur verliefdheid kan sy haarself nie keer nie. Sy breek haar parfuum, was Jesus se voete met haar trane en droog dit af met haar hare…
Sou jy haar vra, of die gedagte dat sy nou enige iets kan doen haar aanspoor tot sonde of tot heiligheid, sal sy nie anders kan as om ‘heiligheid’ te antwoord nie. Sy is alles vergewe, Jesus se liefde was sonder voorwaardes en beperkings, is daar iets wat sy kan terug hou? Is daar iets wat sy vir haarself kan hou as ‘n petty sonde waarvoor sy later sal vergifnis vra? Nee! Daar is ‘n nuwe glinster in haar oë. ‘n Nuwe begeerte… ‘n nuwe verlange… ‘n nuwe liefde.
Hierdie stelling som op hoe Jesus se genade haar lewe verander het:
Nie – “ek is gehoorsaam, daarom word ek aanvaar nie”, maar “ek is aanvaar, daarom is ek gehoorsaam.”
Lees bietjie in Openbariing 2 Jesus Christus se woorde aan die kerk in Efese. Wat hoor jy daarin?
Enige kommentaar of vrae? Voel welkom om terug te skryf en te sê wat jy dink (Kruger)
|
|
Bid ook vir die voorberieidings vir die kerknaweek.
Bid vir Mr. Rita Nkemba van Uganda wat hierdie maand in die UK rondtoer om mense te vertel van die werk wat hulle by die kinderhuis 'Dwelling Places' in Uganda doen, en ook om geld in te samel.
Bid vir Zimbabwe waar daar steeds onsekerheid is. Baie mense word steeds van hulle plase verset.
Bid asseblief vir Elbé en Janette, hulle ma se kanker het wyd versprei deur haar liggaam en sy gaan nie chemo ondergaan nie. Hulle gaan vir die volgende paar maande in Suid-Afrika bly.
Bid steeds vir die kinderhuis bouprojek in Lima, Peru, waar daar tans baie vertragings is om met die bouwerk te begin.
Bid vir Dr. Michael Brown, 'n Joodse gelowige, wat in Mei met Rabbi Shmuel Boteach kom debatteer in London en Oxford. Bid vir wysheid en die regte aanslag.
|
